Nagsugod sa una nga adlaw sang Oktubre ang opisyal nga pagselebrar sang MassKara Festival diri sa siyudad.

Kaupod sang selebrasyon amu man ang paglapta sang mga kapulisan kag patrol cars sa pagmonitor sa seguridad sang siyudad ilabi na sa pito ka festival sites.

Sila amu ang nagapatuman sang peace and order agud malipayon kag hilway ang pagbalik sang MassKara Festival matapos sang duwa ka tuig nga wala ini mahiwat.

Suno sa report sang Bacolod City Police Office (BCPO) madako ang pagnubo sang krimen diri sa siyudad mapafestival ukon non-festival related man ini kumpara sang nagligad nga duwa ka tuig. Nakarekord lang sang 61 minor nga krimen ang kapulisan subong malayo sa 150 sing 2019 kag wala man seryoso nga insidente nga natabo sa pito ka festival sites.

Dugang pa ni PCOL Thomas Joseph I Martir, City Director kag ang BCPO’s Site Task Group (STG) MassKara Commander, malipayon siya kay naging epektibo ang ila pagpalapta sa mga kapulisan sa bilog nga Bacolod kag nakahatag sila sang seguridad sa mga pumuluyo.

Luwas sa madinalag-on nga mga programa nga na preparar sang organizers sang MassKara sa pagtakup sini tinalikdan nga Oktubre 23, 2022, nagapakita man ini sing maayu nga resulta kag binuhatan sang BCPO kag iban pa nga katapo sa gobyerno tungod ang tuyo nila nga proteksiyon para sa mga Bacolodnon kag mga turista ila gid nahatag.
(Source: Bacolod City Public Information Office)