May 24, 2023 – Guinpangunahan ni Bacolod City Mayor Alfredo Abelardo Benitez ang paghiwat sang meeting sa Bacolod City Disaster Risk Reduction Management Council sa posibilidad nga pagtupa sang Super Typhoon Mawar sa pungsod.

Kaupod si Vice Mayor El Cid kag pila sa mga konsehales sang siyudad, gin presentar ni CDRRM Officer Dr. Anna Maria Laarni Pornan ang Pre-Disaster Readiness Assessment (PDRA) Emergency Preparedness, suno sa report sang PAG-ASA ang bagyo ang magasulod sa Philippine Area of Responsibility (PAR) sa adlaw sang biyernes ukon sabado, pero ini maga “recurve” padulong sa pungsod Japan nga may yara sang manubo nga chansa nga magatupa ini sa Philippine landmass.

Ang Super Typhoon MAWAR ang mangin makusog sa Southwest Monsoon kag posible nga maga-ulan sa adlaw sang Dominggo ukon Lunes sa Western Part of Visayas, pero may posibilidad nga indi ini mangin apektado sang bagyo ang siyudad.

Dugang pa, guinpahibalo ang mga Barangay nga mag preparar angot sa banta sang Super Typhoon Mawar, preparasyon sa pagresponde, mga food packs, evacuation centers, kag mga na assign sa transportasyon kag logistics.
(Source: Bacolod City Public Information Office)