DPS personnel nagbisita sa Blastik Project sa banwa sang Binalbagan
Tul-id pagatun-an sang syudad sang Bacolod ang pagdihon sang isa ka plastic recycling project nga mahimo ipatuman sang nagkalain-lain nga barangay sa syudad, matapos nagbisita ang mga opisyal sang Department of Public Services (DPS) sa Blastik Project sang PeacePond Farmers Association sa banwa sang Binalbagan kahapon.
Tinutuyo sang grupo nga ginpangunahan ni Ramel Palalon, tagpamuno sang DPS, lakip nanday Assistant Dept. Head Engr. Joel Vergara kag Administrative Officer IV Ma. Fe Trespuentes, nga tun-an kag hibalu-on ang teknolohiya kag proseso sa pag-recycle sang plastic padulong sa isa ka produkto nga sarang mapuslan sa sulod sang panimalay.
Paagi sa sini nga proyekto, ginalantaw sang administrasyon ni Mayor Albee Benitez nga mahagan-hagan ang basura nga magatupa sa sanitary landfill. Tuyo man sini tudlu-an ang mga pumuluyo nga magbahin-bahin sang ila basura ilabi na ang plastic nga nagatuga sang polusyon.
Suno kay Ma. Fe Trespuentes, plano ni Mayor Albee nga ang recycled products kasubong sang tiles ang mahimo pagagamiton bilang materyal sa pagpatukod sang Pabahay Housing Project para sa mga informal settlers nga sa karon malapit na pagasuguran.
Plano man ni Mayor Albee nga magtukod sang isa ka daku nga Materials Recovery Facility (MRF) agud butangan sang mga na-segregate nga basura, dugang pa ni Trespuentes.
“Blastik Recycling Project”
Ang ‘Blastik Project’ ang isa ka plastic recycling project sang PeacePond Farmers Association sa bulig sang Coca-cola Foundation Philippines kag AID Foundation, Inc. (AIDFI)
Gamit lamang ang shredder machine, extruder machine kag compression oven, nanari-sari nga produkto ang mahuman gikan sa plastic bottles kasubong sang pulungku-an, lamesa, kahita, plastic bowls, tiles, eco-bag kag iban pa.
Suno kay Checcs Orbida, paagi sa Blastik Project, nabuhinan ang plastic nga nagalinapta lamang sa palibot kag nahimo mapuslanon nga produkto nga sarang magamit sang mga konsumidor.
Daku man ang nabulig sang proyekto para sa palangabuhi-an sang 24 ka miyembro sang asosasyon kag pagpa-eskwela sang ila mga kabataan.
May yara naman sang mga “Eco-Ranger” nga amo ang nagalibot kag nagakolekta sang mga plastic paagi sa house-to-house sa diin gina baylohan nila ini sang produkto kasubong sang dishwashing paste/liquid, eco-bag, plastic bowl kag iban pa.
Magluwas sa recycling project, ang asosasyon ang naga-adboksiya man sang organic farming, livelihood programs kag regenerative agriculture (mushroom growing).
Ila man ginapabugal nga “zero carbon footprint” ang ila lima ka ektarya nga proyekto kun sa diin enerhiya gikan sa adlaw ang ila ginamagit.
Ang gina tudlo sa PeacePond ang pagbag-o sang batasan sang tawo kag tudlu-an ang pumuluyo ang mga solid waste management hakson kag batunon bilang parte sang ila pang adlaw-adlaw nga kabuhi (lifestyle), suno pa kay Ordiba.*(jelllanes)
(Source: Bacolod City Public Information Office)
