April 11, 2024 – Isa ka residente naman sang siyudad sang Bacolod ang nakitaan sang manami nga hilimuon sang iya makit-an ang isa ka wallet nga may unod sang kwarta kag isa ka atm card sa dalan sang Libertad.

Ginkilala nga si Emelito Calsona ang nakakita sang wallet, ini siya isa ka BTAO Enforcer kag on duty siya sang nakit-an ya ang wallet. Wala ini siya nag duha-duha kag ginkuha ang wallet kag plano gid sini nga ibalik sa tag-iya.

Suno ky Emelito, ginpangita nila sang iya asawa sa social media kung sin-o man ang may post nga nadulaan wallet. Didto na nagkomento ang iya asawa sa isa ka post sang babayi sa social media nga ginkilala kay Rhonaly Suelan.

Dugang pa sang asawa ni Emelito, iya gincontact ang tag-iya kag iya ginpamangkot ang babayi tuhoy sa mga unod sang wallet.

Subong nga adlaw Abril 11, nagkitaay si Emelito kag Rhonaly sa opisina sang BCD PIO para pormal nga ibalik ang wallet.

Dako gid ang pagpasalamat sang tag-iya sang wallet kay Calsona kag ini siya ang ginhambalan man nga kun may kinahanglan ini, indi gid mahuya magchat sa iya. Siya man ang ginhatagan sang reward bilang pasalamat ni Rhonaly sa iya maayo nga binuhatan.
(Source: Bacolod City Public Information Office)