Para masabat ang panawagan ni Mayor Albee Benitez, nagpatukod sang isa ka Public Assistance Desk sa lobby sang Bacolod City Government Center (BCGC) para maatipanan ang mga pamangkot sang pumuluyo ka Bacolod, ini sa bulig sang City Human Resource Management Services (HRMS).

Ang pagtukod sang nasambit nga desk isa ka “relaunching” nga parti sang Benitez administration para pabakuron ang Republic Act No. 9485 (Anti-Red Tape Act) ukon ang pagtapna sang korapsyon sa proseso kag sistema, upod ang pagpamayo sang frontline public service sa sulod sang gobyerno.

Tuyo sang Public Assistance Desk nga mag sabat kag atipanon ang mga public transactions, document processes, kag mga pamangkutanon sang pumuluyo sang siyudad.

Ka upod man diri ang pag pamati kag paghatag aksyon sang ila mga reklamo kag mga panugda-on nahanungod sa nanari-sari nga ahensiya, ukon kagawaran sang gobyerno.

Suno kay Erman Aguirre, City Human Resource Management Officer, “customer service ang priority gid ni Mayor Albee…puwede sila mag sulat kag maghulog sa suggestion box para sa ila mga reklamo kag rekumendasyon para matawag ang atensiyon sang ila gina tumod.”

Magahalin sa regular employees sang BCGC ang magapungko sa desk kag sila ginatawag nga frontline service officers.

Sa Setyembre 16, magahiwat sang seminar on front office management ang HRMS para sa “effective customer service” sang mga nasambit nga frontline service officers.