Nagtambong ang nagkalain-lain nga mga grupo kag asosasyon sa syudad sang Bacolod sa ginpatigayon nga Livelihood Project Meeting nga ginpangunahan sang City Cooperative and Livelihood Office sini nga hapon sa Bacolod Government Center.

Ang amu nga pagtililipon ang gin buylogan man sang opisina ni Konsehal Thaddy Sayson, Chairman sang Committee on Cooperative and Livelihood kag ni Executive Assistant Ms. Lea Carmela Bantug-Zayco sang Multi-Sectoral Office and Livelihood Program.

Nanari-sari nga mga programa kag proyekto ang gin presentar sang mga asosasyon kalakip ang hauling trucks, computerized embroidery machine, vendo water dispenser, tricycle for rent, food cart, fishing boat, water refilling station kag iban pa.

Suno kay Konsehal Thaddy Sayson, iya gina pasiguro nga suportado sang syudad sa liderato ni Mayor Albee Benitez ang tanan nga proyekto para sa kaayohan sang mga miyembro sang tagsa ka asosasyon.

Iya man ginpa-alinton ang mga ini nga sigurohon nga magpa-acredit sa Sangguniang Panlungsod para sa madasig nga pag proseso sang ila aplikasyon kag ma-release gilayon ang ila gin proponer nga proyekto.

Sa bahin ni Executive Assistant Carmeli Bantug-Zayco, iya gin pahayag nga bukas lang ang iya talatapan sa pag-facilitate agud matigayon ang gina pangayo nga proyekto sang mga asosasyon.

Lakip sa nagtambong ang grupo sang mga small and fish vendors association, tricycle operators, Overseas Filipino Workers (OFW) association, small farmers association kag disability and rehabilitation association.