Ang Anti-Mendicancy Team sang Siudad sang Bacolod nagpatigayon sang ila regular nga paglibot sa mga kalye alas sais y medya kagab-i kag naaktuhan ang mga kabataan nga nagapangayo-kayo sa Dalan Ramos nga nagaedad 4 tubtub 13 ka tuig kag nagapuyo sa barangay 2 kag 3.

Suno kay Anjanette S. Servano, Social Welfare Officer II kag CAMTF Focal Person, ang grupo nagdokumento sang mga pangalan sang kabataan, nagkoordinar sa ila mga barangay, kag nagpatigayon sang mga dayalogo sa ila mga pamilya agud tudluan sila parte sa responsibilidad bilang mga ginikanan kag mga layi nga naga penalisa sang kapabayaan sa kabataan. Ang CAMTF nagahimo man sang mga aktibidad sa komunidad agud ipahibalo sa publiko nga ang mga ginikanan nga naga eksplota sa kabataan para sa pagpangalimos, magahatag sang penalidad.

Base sa Bacolod City Ordinance No. 146 nga nagaregular sang mendikansya, nagahatag sang penalidad kag nagaprovide sang pondo para sa mga programa nga may kalabutan sini. Si DSSD Head Richelle Verdeprado, RSW, PhD, nagpasiguro nga ang ordinansa naga-require nga ang bisan ano nga bata nga wala pa nag-8 anyos nga makita nga nagapangayo-kayo ukon pakalimos ang ipahamtang sa pag-atipan sang DSSD, temporaryo nga shelter, ukon sa isa ka lisensyado nga ahensya.

Ang DSSD nagahangyo man sa publiko nga indi maghatag sang kwarta sa mga nagapangalimos sa kadalanan kag imbes, itudlo sila sa departamento para sa husto nga pag-atipan sang kaso.

Ini nga inisyatibo sang Anti-Mendicancy Team nagatuyo nga magpadayon sa pagprotekta sa kabataan kag magtugot sa mga ginikanan nga mangin responsable sa ila mga kabataan, pinaagi sa pagpasiguro nga sila safe kag malayo sa mga posible nga delikado nga sitwasyon.

Source: Bacolod City PIO