Sumugod una nga adlaw sang Mayo, mangin epektibo na ang Bacolod Comprehensive Health Program (BacCHP) amu sa paggamit sang BacCHP card nga gina amat-amat panagtag sang siyudad.
Subong nga Martes, Abril 18, nagsugod panagtag ang mga BacCHP officers kag liaisons sang card sa mga pumuluyo gikan sa nagkalain-lain nga barangay sa Bacolod.
May kabug-usan nga 1,623 cards ang ginpanagtag sa mga barangay sang Villamonte, Montevista, Estefania kag Alangilan.
May yara 400 temporary cards kag 96 aktuwal BacCHP cards nga ginhatag sa mga pumuluyo sang Brgy. Villamonte kag walo ka temporary cards kag apat ka aktuwal cards sa Brgy. Montevista.
Sa Brgy. Estefania, 317 temporary cards kag 205 aktuwal cards amu ang ginpanagtag. 160 aktuwal cards kag 397 temporary cards ang ginhatag sa mga pumuluyo sa Brgy. Alangilan.
Ang temporary cards amu ginpanghatag sa mga barangay indigents nga wala naka rehistro sa BacCHP. Samtang ang mga indigents nga nakaparehistro antes sa card distribution amu ang naka-baton sang aktuwal card.
Nagpatigayon man sang BacCHP orientation ang siyudad para sa dugang nga pagpahibalo sa mga benepisyaryo nahanungod sa programa.
Sa subong nga bulan sang Abril, nagaiskedyol ang padayon nga pagpanagtag kada Martes kag Huwebes: Abril 20 sa Brgy. Granada kag; Abril 25 sa Brgys. 1, 2, 3, 4, 5, 6, 7 kag Banago; kag Abril 27 sa Brgys. Bata kag Mandalagan.
(Source: Bacolod City Public Information Office)
