January 25, 2025- Ang Asenso Yuhum Housing Project ang isa sa mga inisyatibo ni President Bongbong Marcos sa idalom sang 4ph program nga ginsuportahan man ni Mayor Albee Benitez sa siyudad sang Bacolod.

Opisyal na nga gin-turnover sa mga Benepisyaryo ang yabi sang ila nga mga balay sa Asenso Yuhum Housing sa Purok Arao, Brgy. Vista Alegre kadungan ang pagblessing sang mga units sa building 1.

Sa pagpanguna ni Mayor Albee Benitez, kaupod si Congressman Greg Gasataya, ang mga konsehales sang siyudad sang Bacolod nga amo nanday Thaddy Sayson, Al Espino, Vladimir Gonzalez, Celia Flor, Pao Sy, Ising Salanga, Em Ang, kag Kalaw Puentevella, BHA head Ma. Victoria Parreñas kag PAG-IBIG Department Manager Institutional Housing Jackelyn Constantino, nangin mabinungahon ang amo nga okasyon.

“Today, makuha niyo na gid ang yabi sang inyo nga unit para maistaran niyo na ang inyo nga balay. Ang handum naton nga ang tanan nga mga Bacolodnon wala may mabilin nga wala balay.” pahayag ni Mayor Albee Benitez sa iya gapanguna nga mensahe.

Ini nga inisyatibo nagapamatuod sa aktibo nga tikang nga ginahimo sang lokal kag nasyonal nga gobyerno para sa ikaayo sang publiko kag ang tanan nga indibidwal may ara matawag nga puluy-an.

Source: Bacolod City PIO